Ստեփանակերտի կենտրոնում ճարտարապետական բացառիկ լուծումներով նոր զբոսայգի է կառուցվում (լուսանկարներ)

Ստեփանակերտի կենտրոնում` Վերածննդի հրապարակի հարևանությամբ, սկսվել է Արցախի ազատամարտիկների զբոսայգու կառուցման աշխտանքները. ընթացքի մեջ են հողային ու հենապատերի կառուցման աշխատանքները:

Ինչպես տեղեկացրին ԼՂՀ քաղաքաշինության նախարարությունից, զբոսայգին ունենալու է  Ճարտարապետական յուրահատուկ լուծումներ ու ժամանակակից շինություններ. այն հանգստի ու ժամանցի իդեալական վայր է լինելու :

Ներկայացնելով զբոսայգու կառուցվածքը` «Արցախպրես»-ին հայտնեցին, որ գլխավոր մուտքը լինելու է Վերածննդի հրապարակից, երկրորդը` Հովհ. Թումանյան փողոցից, երրորդ մուտքը` Ստեփ.Շահումյանի անվան մարզադաշտին հարող «Սիրո պուրակ»-ից:

Ազատամարտիկների անվան զբոսայգու` ամբողջությամբ կանաչապատ տարածքն ունենալու է ցայտաղբյուրներ ու ծառուղի: Տարածքի տարբեր հատվածներում նախատեսվում է տեղադրել նստարաններ: Կենտրոնական հատվածում էլ կառուցվելիք օղակաձև ինքնատիպ շատրվաններից ջուրը հոսելու է կասկադով :

Զբոսայգու հարևանությամբ գտնվող Արցախի Ազատամարտիկների միության վարչական շենքի ետնամասում նախատեսվում է կառուցել  երկհարկանի կցակառույց, որի առաջին հարկում, ըստ նախագծի, լինելու են հանրային սանհանգույցն ու տեխնիկական սպասարկաման սենյակները:

Այստեղ նախատեսված են նաև մանկական խաղասրահ, իսկ երկրորդ հարկում վետերան-ազատաարտիկների հանգստի համար  լինելու է  բացօթյա տաղավար: Տարածքում կբացվեն  սրճարաններ, 150 տեղանոց ամֆիթատրոն և այլ ժամանցային վայրեր:

Իր տեսակով ու ճարտարապետական լուծումներով Ազատամարտիկների զբոսայգին Արցախի մայրաքաղաքում առաջինը կլինի: Այն նախագծել է «Նարինե և Գեղանի» կազմակերպությունը, որը հատուկ ուշադրություն է դարձրել նաև սահմանափակ կարողություններ ունեցող մարդկանց տեղաշարժն ապահովելուն:

Նշենք նաև, որ կառուցվող  զբոսայգին իրականացվում է Արցախի Ազատամարտիկների Միության ֆինանսական միջոցներով և Երևանի քաղաքապետարանի  աջակցությամբ: