Արցախի ազատամարտիկների միության վարչության նախագահ, գեներալ-մայոր Սամվել Կարապետյանի երախտիքի խոսքը «Մարտական խաչ» 2-րդ աստիճանի շքանշանի ասպետ Էդմոն Ալեքսանդրի Բարսեղյանի ծննդյան 50-ամյակի առթիվ

Հայրենակիցներ, այսօր Արցախյան գոյապայքարի նվիրյալ Էդմոն Բարսեղյանը կդառնար 50 տարեկան, բայց այն առաքելությունը, որ նրան վիճակվեց ճակատագրով, սրբազան պարտք էր, սեփական արյան գնով հող-հայրենին պաշտպանելու:

«Բավական չէ իր ազգի զավակը լինել, պետք է նաև նրա հրաշունչ զինվորը լինել»: Այս նվիրական խոսքերով է առաջնորդվել քաջարի ազատամարտիկն ու նվիրյալ հայորդին, Արցախի ազատության և անկախության համար չխնայելով ամենաթանկը՝ երիտասարդ կյանքը:

Եվ այսօր կարող ենք վստահորեն ասել, որ նրա անցած մարտական ճանապարհը ոչ միայն արիության դաս է, այլև հավատի, ոգու և միասնական պայքարի պայծառ խորհրդանիշ:

Գլուխ խոնարհենք Արցախյան գոյամարտում զոհված ազատամարտիկների հիշատակի առաջ: Հիրավի՛, նրանք էին հաղթանակների հիմքը դնողները և նրանք պետք է համարժեք գնահատականի արժանանան:

Ակնհայտ է, որ հերոսների զավակներն էլ հերոսներ են: Դրա վկայությունը հենց Ապրիլյան պատերազմի ժամանակ երիտասարդ սերնդի ցուցաբերած քաջությունն ու արիությունն է, որոնց շնորհիվ ջարդվեցին ագրեսորի զորամիավորումները: Եվս միանգամ հաստատվեց այն ճշմարտությունը, որ ազգի միասնությունն ու համախմբվածությունը հաղթանակի գրավականն են:

Իմ խորին երախտագիտությունն ու շնորհակալությունն եմ հայտնում Ազատամարտի նվիրյալ Էդմոն Բարսեղյանի հարազատներին, Ասկերանի միջնակարգ դպրոցի ուսուցիչներին՝ այդպիսի հայրենասեր զավակ դաստիարակելու համար:

Փա՜ռք հերոսական հայրենիքի անձնվեր ու քաջակորով ազատամարտիկներին, փա՜ռք Երկրի ազատության և անկախության համար իրենց կյանքը նվիրաբերած քաջորդիներին:

Արցախի ազատամարտիկների միության

վարչության նախագահ, գեներալ-մայոր                                                            Ս. Ջ. Կարապետյան