Արցախի ազատամարտիկների միության վարչության նախագահ, գեներալ-մայոր Սամվել Կարապետյանի երախտիքի խոսքը «Մարտական Խաչ» երկրորդ աստիճանի շքանշանի ասպետ Վարդան Ժորայի Ջիվանշիրյանի ծննդյան 55- ամյակի կապակցությամբ

Հայրենակիցներ

Արցախյան գոյապայքարի նվիրյալ Վարդան Ջիվանշիրյանը այսօր կդառնար 55 տարեկան, բայց նրա առաքելությունը այլ էր. հայրենիքի ազատության և անկախության համար նա մարտիրոսվեց՝ փրկելով հող-հայրենին և ազատագրելով հայոց  ոստան Արցախը:

Դպրոցի ֆիզկուլտուրայի և ռազմագիտության երբեմնի ուսուցիչը անմնացորդ նվիրվածությամբ և մեծ պատասխանատվությամբ ձեռնամուխ եղավ Արցախի ազատության և անկախության սուրբ գործին, կատարելով Հայրենիքի հանդեպ իր սրբազան պարտքը: Նվիրյալ հայորդու և վաշտի հրամանատարի անցած մարտական ճանապարհը ռազմահայրենասիրական դաստիարակության լավագույն միջոց է սերունդների համար:

Անգնահատելի է  Վարդան Ջիվանշիրյանի ու նրա մարտընկերների կատարած սխրանքը: Ազատամարտի մեր նվիրյալները չխնայեցին անգամ իրենց երիտասարդ կյանքը՝ հայրենիքի փրկության ու ազատության համար:

Գլուխ խոնարհենք Արցախյան գոյապայքարում մարտիրոսված քաջորդիների անմահ հիշատակի առաջ:

Ճշմարիտ է ասված. «Հաշտվելով մահվան գաղափարի հետ՝ մարդս դառնում է եղբայրն ու զինակիցը այն բոլորի, որոնք մարդկային ցեղի պատմության բոլոր դարերում եկել ու անցել են մեր աշխարհով իբրև լույսի, հավատքի և սուրի հերոսներ»:

Հիրավի՛, Վարդան Ջիվանշիրյան ազատամարտիկի, հայրենանվեր հայորդու կերպարը, նրա կյանքի յուրաքանչյուր դրվագ իր անունը կրող դպրոցի աշակերտների համար ուսանելի և օգտակար խորհուրդներ ունեն:

Իմ խորին երախտագիտությունն ու շնորհակալությունն եմ հայտնում Արցախյան գոյապայքարի նվիրյալ Վարդան Ջիվանշիրյանի հարազատներին և ուսուցիչներին՝ այդպիսի հայրենասեր զավակ դաստիարակելու համար:

Փա՜ռք հայրենիքի ազատության և անկախության համար իրենց կյանքը նվիրաբերած քաջորդիներին:

Փա՜ռք հայոց բանակին:

Փա՜ռք հայ ժողովրդին, որ վստահորեն կերտում է իր ապագան:

Արցախի ազատամարտիկների միության վարչության նախագահ, գեներալ – մայոր

Ս. Ջ. Կարապետյան