Արցախի ազատամարտիկների միության վարչության նախագահ գեներալ-մայոր Սամվել Կարապետյանի ուղերձը Աֆղանստանից խորհրդային զորքերի դուրսբերման 30-րդ տարելիցի կապակցությամբ

Աֆղանստանի պատերազմի հարգարժան վետերաններ

Այսօր մենք հպարտություն ենք ապրում՝ պատմական հեռվից նայելով Ձեր անցած մարտական ճանապարհին: Դուք կարողացել եք ոչ միայն խիզախել, այլև բարձր պահել հայ զինվորի անունն ու պատիվը:

 Իսկ երբ սկսվեց Արցախյան գոյապայքարը, Դուք կամավորականների շարքերում էիք և Ձեր խիզախությամբ ու անհատական նախաձեռնությամբ ոգևորեցիք երիտասարդ մարտիկներին՝ նրանց մեջ արթնացնելով մարտնչող հայի բացառիկ դրսևորումները: Անշուշտ, հարկ է նշել նաև, որ աֆղանական դաժան պատերազմում ձեռք բերած մարտական փորձն ու հմտությունը կարողացաք ներդնել Արցախյան գոյապայքարում, վայելելով ժողովրդի համակրանքն ու սերը:

 «Հերոսական են մարդկային այն գործերը միայն, որոնց վրա ժամանակն ու մահը իշխանություն չունեն»: Համոզված եմ, որ Ձեր պատմական առաքելությամբ այսօր էլ շարունակում եք ոգևորել երիտասարդ սերունդներին՝ նրանց մեջ ամրապնդելով խիզախումների համառ ոգին, անկոտրում կամքն ու վճռականությունը:

 Հայրենակիցներ, Արցախյան գոյապայքարում հաղթանակներ կռած ազատամարտիկներ, ունկնդրելով ժամանակի պահանջին, այսօր Դուք ոչ միայն կերտում ու շենացնում եք երկիրը, այլև ռազմահայրենասիրական դասերով ամրապնդում եք երիտասարդ սերունդների մարտական ոգին:

 Փա՜ռք հաղթանակներ կերտած մեր հերոսներին:

 Փա՜ռք հայոց բանակին:

Փա՜ռք հայ ժողովրդին, որ վեհանձնորեն կերտում է իր ապագան:

 

Արցախի ազատամարտիկների միության, վարչության նախագահ, գեներալ-մայոր 

          Ս. Ջ. Կարապետյան