Արցախի ազատամարտիկների միության վարչության նախագահ գեներալ-մայոր Սամվել Կարապետյանի ցավակցական խոսքը Տավուշի սահմանային դիրքերում մարտիրոսված զինծառայողների հարազատներին

Հայրենակիցնե՛ր

Արցախի ազատամարտիկների միության վարչությունը ցավակցում ու վշտակցում է Տավուշի սահմանային դիրքերում հերոսաբար զոհված զինծառայողների՝ մայոր Գարուշ Վեմիրի Համբարձումյանի, կապիտան Սոս Փայլակի Էլբակյանի, կրտսեր սերժանտ Սմբատ Գևորգի Գաբրիելյանի, կրտսեր սերժանտ Գրիշա Վահանի Մաթևոսյանի հարազատներին և զորակցություն հայտնում նրանց մերձավորներին ու բարեկամներին:

Նրանց հերոսական կերպարը սերունդների սրտերում կապրի, որպես պայքարի ու մաքառման խորհրդանիշ: Քաջերի վարքն ու գործը իրենց ապրած ժամանակի մեջ չեն սահմանափակվում, որովհետև նրանց կյանքն ու ճակատագիրը մշտապես ապրում են՝ սերունդների համար դառնալով արիության ու սխրագործության դաս:

Արցախի ազատամարտիկների միության վարչությունը իր խորին երախտագիտությունն ու շնորհակալությունն է հայտնում մարտիրոսված զինծառայողների հարազատներին և ուսուցիչներին՝ այդպիսի նվիրյալ և հայրենասեր զավակներ դաստիարակելու համար, միաժամանակ վստահեցնում է, որ ազատամարտիկները ինչպես երեկ, այսօր էլ պատրաստ են կանգնել մարտական ծառայություն իրականացնող զինվորի կողքին:

Փա՜ռք հերոսական մեր հայրենիքի անձնվեր ու քաջակորով զինծառայողներին, փա՜ռք Հայոց բանակին, փա՜ռք հայ ժողովրդին, որ վստահաբար կերտում է իր ապագան:

 

Արցախի ազատամարտիկների միության վարչության նախագահ,

գեներալ-մայոր Ս. Ջ. Կարապետյան