Օդում կախվեց աշխարհակուլ մի պատերազմ,
Իսկ գարո՜ւն էր……
Պարույր Սևակ
Այսօր՝ ապրիլի 24-ին Արցախի ազատամարտիկների միության վարչության անդամները մի շարք ազատամարտիկների հետ հարգանքի տուրք մատուցեցին Հայոց ցեղասպանության անմեղ զոհերի հիշատակի առջև:
Ուղիղ 106-տարի առաջ Օսմանյան կայսրությունը հայոց ցեղասպանության միջոցով, նպատակ ուներ մեկընդմիշտ լուծել հայոց հարցը, քողարկելով դարի հանցագործությունը՝ աշխատասեր ու բարձր մշակույթի տեր մի ամբողջ ժողովուրդ լրիվ ոչնչացվեց: Այս ծրագրի արդյունքում միլիոնավոր հայեր կտտանքների ենթարկվեցին, գաղքի ճամբա բռնեցին: Անկախ սեռից, անկախ տարիքից օսմանյան թուրքիայի այս ոճրագործությանը զոհ էին գնում բոլորը:
Հայոց ցեղասպանությունը մեր պատմության մեծագույն ողբերգությունը լինելուց զատ, նաև ամենակարևոր դասն է, որից պետք է հետևություններ անել, մեկ դարից ավել է` հայը կանգնած է յաթաղանի առաջ: Այդ ողբերգությունը ցավալի, բայց և ապրեցնող է: Կորուսյալ հայրենիքի և ներկա սերնդի անկոտրում կամքը մեզ պարտավորեցնում է վերհառնել և շարունակել ապրել, արարել ի լուր աշխարհին:
Համայն հայ ժողովուրդը դեռևս սպասում է ճշմարտության հաղթանակին և արդարության հաստատմանը, 106 տարի է հայ ժողովուրդը պայքարում է արդարության համար:
Մենք չենք լռելու, մինչև որ աշխարհը չճանաչի թուրքի ձեռագիրն ու մեր խաղաղ ապրելու իրավունքը:
Հիշում ենք և պահանջում: